पेट्रोलियम पदार्थको मूल्य वृद्धि र अभावबारे लेखाले जानकारी लिँदै

१५ फागुन, काठमाडौँ । व्यवस्थापिका संसदअन्तर्गको सार्वजनिक लेखा समितिले पेट्रोलियम पदार्थको मूल्य वृद्धि र बजारमा रहेको चर्को अभावका सम्बन्धमा जानकारी लिन सम्वद्ध पक्षका अधिकारीलाई बोलाएको छ ।

बिहान ११ बजेपछि सिंहदरबारस्थित समितिको कार्यालयमा बस्ने अर्थमन्त्री वर्षमान पुन, बाणिज्य तथा आपूर्तिमन्त्री खेलराज भट्ट, अर्थ र आपूर्ति मन्त्रालयका सचिव तथा नेपाल आयल निगमका महाप्रवन्धकलाई बोलाइएको सभापति रामकृष्ण यादवले  जानकारी दिनुभयो । बैठकमा पटकपटक मूल्यवृद्धि गरिनुको कारण र मुल्य वृद्धिका बावजुद पनि बजारमा पेट्रोलयम पदार्थको हाहाकार भएको विषयमा सम्वघ अधिकारीहरुबाट जानकारी लिइने यादवले बताउनुभयो ।

सरकारले अन्तर्राष्ट्रिय बजारमा भएको मूल्य वृद्धि र नेपाल आयल निगमको घाटालाई देखाएर शुक्रबारदेखि लागू हुने गरी पेट्रोल, डिजेल, मट्टितेल र आन्तरिकतर्फको हवाई इन्धनमा प्रतिलिटर चार/चार रुपैयाँका दरले मूल्य वृद्धि गरेको थियो । मूल्य वृद्धिपछि पनि उपभोक्ताले सहज रुपमा इन्धन पाउन सकिरहेका छैनन् ।