डोटीको खातीवडा गाविस १ कटुवाल गाउँको लेकमा एक दम्पत्ती मृत अवस्थामा फेला I

 चैत ५,डोटीको खातीवडा गाविस १ कटुवाल गाउँको लेकमा एक दम्पती मृत अवस्थामा फेला परेका छन् । कटुवाल गाउँका ६५ वर्षिय काले कटुवाल र उनकी धर्मपत्नी ६२ वर्षीया राजुदेवी कटुवाल मृत अवस्थामा फेला परेका छन् । उनीसँगै कटुवाल दम्पतीको ६ वर्षिय नाती दिपक वेहोस अवस्थामा फेला परेका छन् । 
गाउँदेखि ४ घण्टा टाढा लेकमा रहेका खेतमा आलु लगाउन गएका कटुवाल दम्पती र उनको नाति शनिबार वेलुकासम्म घर नफर्किएपछि गाउँले खोज्न गएका थिए । मृतक कालेको टाउको र शरिरमा चोट लागेको छ भने राजुको मुखबाट रगत बगेको जिल्ला प्रहरी कार्यालय डोटीले जनाएको छ । नावालक दिपक भने वेहोस अवस्थामा छन् । कटुवाल दम्पती शुक्रबार दिउँसो आलु लगाउन लेक गएका थिए ।
जिल्ला प्रहरी कार्यालय डोटीका प्रहरी नायव उपरीक्षक भरत बोहराका अनुसार शनिबार बेलुकी ७ बजे मात्रै घटना थाहा पाएपछि प्रहरी घटनास्थल तर्फ गएको छ । यो समाचार तयार पारुन्जेल सम्म मृतकको शव घटनास्थलबाट उठाएर गाउँ सम्म ल्याउने तयारी भइरहेको छ । शवलाई पोष्टमार्टमका लागि आईतबार मात्रै सदरमुकाम सिलगढी ल्याइने छ । घटनास्थल सदरमुकाम सिलगढीबाट ८ घण्टाको पैदल पछि मात्रै पुग्न सकिन्छ । 
घटना सुनियोजित हुन सक्ने भन्दै थप जानकारी पोष्टमार्टमपछि मात्रै थाहा हुने प्रहरीले जनाएको छ ।स्रोत : नागरिक

Posted by Arghakhanch Online on 4:49 AM. Filed under News, राष्ट्रिय समाचार . You can follow any responses to this entry through the RSS 2.0