बाहिरबाट कुखुरा ल्याउन बन्देज लगाउन माग

११ फागुन,लमजुङ । यस जिल्लाका कुखुरापालक किसानले बाहिरी जिल्लाबाट यहाँ कुखुरा आयात नगर्न माग गरेका छन् । बाहिरबाट रोगी कुखुरा भित्रयाउँदा रोग फैलने डर भएकाले यसमा प्रतिबन्ध लगाइनुपर्ने उनीहरूको तर्क छ ।  यद्यपि बाहिरबाट कुखुरा आयात गर्नैपर्ने अवस्था आएमा पशु क्वारेन्टाइन पास गरेर मात्र ल्याइनुपर्ने उनीहरूको सुझाव छ ।  कुखुरापालक किसानले यसबारे जिल्ला पशुसेवा कार्यालयसँग परामर्श पनि गरेका थिए ।

परामर्शपछि उनीहरूले कायममुकायम प्रमुख जिल्ला अधिकारी बाबुराम लामिछानेलाई भेट गरी सो व्यवस्था मिलाइदिन आग्रह गरेका थिए । जिल्लामा ब्रोइलर कुखुराको व्यावसायिक उत्पादन बढ्दै गएको र सो जिल्ला कुखुराका लागि आत्मनिर्भर हुने अवस्थामा पुगिसकेकाले जिल्ला जिल्लाबाट कुखुरा आयात गर्न नपर्ने कुखुरापालक किसानको तर्क छ । रासस