एसएलसीपरीक्षा केन्द्रमा गोली चल्यो

चैत ११- चिट चोराउन नदिएको भन्दै शुक्रबार पूर्वि सुर्खेतको बजेडीचौरस्थित एसएलसी परीक्षा केन्द्रमा स्थानीयले प्रहरी र शिक्षकमाथि ढुंगामुढा गर्न थालेपछि प्रहरीले भिड तितरबितर पार्न चार राउन्ड गोली फायर गरेको छ। बिहान ११ बजे गणित विषयको परीक्षा सकिएको पाँच मिनेटमै हजारको संख्यामा विद्यालयबाहिर जम्मा भएका स्थानीयले प्रहरी र परीक्षाकेन्द्रका शिक्षकमाथि ढुंगामुढा गरेका थिए। त्यसबाट सुरक्षार्थ खटिएका बादेपिपल इलाका प्रहरी कार्यालयका प्रहरी निरीक्षक योगेन्द्रसिंह थापाको चिउरोमा चोट लागेको छ। चारैतिरबाट घेरा हालेर एकोहोरो रुपमा ढुंगामुढा हुन थालेपछि प्रहरीले स्थितिलाई नियन्त्रणमा लिन चार राउन्ड हवाई फायर गर्नुपरेको जिल्ला प्रहरी कार्यालयका एसपी गोविन्दराम परियारले बताए। 'ग्यास गन नभएकाले ३०३ राइफलबाट हवाई फायर गर्नु परेको हो,' उनले भने, 'यसले गर्दा थोरै सुरक्षाकर्मी भएको घटनास्थलमा कुनै अप्रिय स्थिति निम्तिएन।' वीरेन्द्रनगरदेखि करिब ७० किलोमिटर पूर्वमा अवस्थित बजेडीचौरमा राकमबाट प्रहरी निरीक्षक थापाको कमान्डमा १३ प्रहरी तैनाथ थिए। आइतबारदेखि केन्द्रमा थप प्रहरीबल खटाएर परीक्षालाई मर्यादित बनाइने जिल्ला प्रहरी कार्यालयले जनाएको छ।
विगतमा स्थानीयले खुलेआम बाहिरबाट चिट चोराउने गरेकाले यसपटक कडाई गर्न खोज्दा स्थानीयले आक्रमण गरेका केन्द्राध्यक्ष हिक्मत रोकाले बताए। 'हामीले प्रहरीको सहायोगमा बाहिरबाट चिटिङ हुन दिएनौँ,' उनले भने, 'भित्र पनि टाइट गरेपछि यस्तो स्थिति आयो।' केन्द्रमा बागेश्वरी उमावि राकम, मावि काफलकोट, मावि आग्रीगाउँ र मावि सुन्तलाका ३ सय ६८ विद्यार्थी सहभागी छन्। उनीहरुका अभिभावकहरुले परीक्षा अत्यन्त कडा भएको जनाउँदै अलिकति खुकुलो पार्न माग गर्दै आएका थिए। झडपपछि अधिकांश परीक्षार्थी र शिक्षकहरु एक घन्टासम्म स्कुलमै 'बन्दी' भएका थिए। 'परीक्षामा यस्तो स्थिति त मैले कहिल्यै देखेको थिएन,' निरीक्षकको रुपमा खटिएका सूर्यज्योति उमावि मेहलकुनाका शिक्षक इन्द्रबहादुर थापाले भने, 'परीक्षामै गोली चल्ने स्थिति आएपछि कसरी काम गर्ने?' स्थानीय र प्रहरीबीच करिब १५ मिनेटसम्म दोहोरो झडप भएको उनले बताए। source thoolapokhara

Posted by Arghakhanch Online on 9:32 PM. Filed under News, राष्ट्रिय समाचार . You can follow any responses to this entry through the RSS 2.0