एन्फा अध्यक्ष गणेश थापाले मर्यादा पुर्याएनन्
News, राष्ट्रिय समाचार 9:40 PM
काठमाडौँ, फागुन २६ फिफा अध्यक्ष सेप ब्लाटरको नेपाल भ्रमणबाट उत्साहित एन्फा अध्यक्ष गणेश थापा एएफसी च्यालेन्ज कपको स्वागत मन्तव्यका क्रममा थुप्रैपटक चिप्लिए। ब्लाटरसँगै एएफसीका कार्यवाहक अध्यक्ष झाङ जिलोङ, प्रधानमन्त्रीदेखि एमाले नेता केपी ओली सम्मको नाम उल्लेख गर्न भ्याएका थापाले उपस्थित व्यक्तित्वको मर्यादाक्रममा भने ख्याल गरेनन्। उनले प्रधानमन्त्री बाबुराम भट्टराईका अगाडि नै पूर्वप्रधानमन्त्रीहरूको नाम लिए। नेपाली कांग्रेसका सभापति सुशील कोइरालाको नाम पनि पुछारमा उच्चारण गरे।
'संसारको फुटबलका एकमात्र नेता ब्लाटर नेपालमा हुनुहुन्छ' भन्दै स्वागत मन्तव्य सुरु गरेका उनले त्यसपछि पूर्वप्रधानमन्त्री माधवकुमार नेपाल, कांग्रेस संसदीय दलका नेता रामचन्द्र पौडेल, माओवादी अध्यक्ष प्रचण्ड, पूर्व प्रधानमन्त्री शेरबहादुर देउवा, राप्रपा नेपालका अध्यक्ष कमल थापा लगायत शीर्षनेताहरूको नाम लिएका थिए। नाम लिँदालिँदै उनले थपे, 'मैले सुरुमै भन्न छुटाएछु, नेपाल कांग्रेसका सभापति सुशील कोइराला पनि हुनुहुन्छ।' अन्त्यमा आइपुगेका व्यक्तितर्फ संकेत गर्दै उनले भने, 'भर्खरै एमाले नेता केपी ओली पनि आइपुग्नुभएको छ।'
कार्यक्रमका उद्घोषकले पनि औपचारिक कार्यक्रमको मर्यादा भुल्दै जथाभावी सम्बोधन गरेका थिए। राज्यमन्त्रीलाई सबभन्दा पहिला सम्बोधन गरेका उनले सभामुख तथा पूर्वप्रधानमन्त्रीलाई पछि पारेका थिए। source (नागरिक)
Posted by Arghakhanch Online
on 9:40 PM.
Filed under
News,
राष्ट्रिय समाचार
.
You can follow any responses to this entry through the RSS 2.0
