माओवादी स्थायी समिति बैठक बस्ने

१८ फागुन । सरकार नेतृत्वकर्ता दल एकीकृत नेकपा माओवादीको स्थायी समिति बैठक आज बस्दैछ ।

प्रमुख तीन दलका शीर्ष नेताको बैठकलगत्तै अध्यक्ष प्रचण्डको निवास लाजिम्पाटमा बस्ने बैठकमा पार्टीको भावी रणनीति तथा राष्ट्रिय सरकार गठनका विषयमा छलफल हुने बताइएको छ । बैठकमा अध्यक्ष प्रचण्डले तीन दलको शीर्ष बैठकमा आफूले पेस गरेको शान्तिप्रक्रियासम्बन्धी प्रस्ताव तथा अरुबाट संविधान र आयोगहरु गठनका सम्बन्धमा आएको प्रस्तावबारे सदस्यहरुलाई जानकारी दिने कार्यक्रम छ । माओवादीमा उपाध्यक्ष मोहन वैद्य पक्षले अर्का उपाध्यक्ष डा. बाबुराम भट्टराईको नेतृत्वको सरकारको राजीनामा माग गरिरहेको छ । वैद्य पक्षीय नेताहरुले आजको बैठकमा पनि राष्ट्रिय सहमतिको वातावरण बनाउनका लागि प्रधानमन्त्रीको राजीनामाको विषय उठ्ने बताए । अध्यक्ष प्रचण्ड र प्रधानमन्त्री भट्टराई भने तत्काल सरकार छाड्ने मनस्थितिमा छैनन् ।

यस्तै स्थायी समितिमा लडाकुबाट वाईसीएलमा तानिएकाहरुलाई आर्थिक प्याकेज दिने विषयमा पनि छलफल गर्नेछ । लडाकुबाट वाईसीएलमा आएकाहरुले स्वैच्छिक अवकासमा जाने लडाकुसरह आर्थिक प्याकेजको व्यवस्था हुनुपर्ने माग गर्दै आन्दोलन घोषणा गरेपछि माओवादीले स्थायी समिति सदस्य नेत्रविक्रम चन्द र पोलिट्ब्युरो सदस्य जनादर्शन शर्मालाई त्यसका लागि आर्थिक स्रोत पहिल्याउने जिम्मेवारी दिएको थियो ।

सम्बन्धित पोस्ट हरु : News, राष्ट्रिय समाचार