जन्तीबस दुर्घटनामा बेहुलासहित २२ घाइते

१२ फागुन, सिन्धुपाल्चोक । सिन्धुपाल्चोकको बाँसबारी गाविस-९ धुन्चेमा शुक्रबार बिहान जन्तीबस दुर्घटना हुँदा त्यसमा सवार बेहुलासहित २२ जना घाइते भएका छन् ।

जन्ती सवार बा. २ ख २९३९ नम्बरको बस बाँसबारी सडक खण्डको धुन्चेमा अनियन्त्रित भएर पल्टिएको प्रहरीले बताएको छ । घाइतेमध्ये ४ जनाको अवस्था गम्भीर रहेको प्रहरीले जनाएको छ । गम्भीर घाइतेको स्थानीय स्वास्थ्य संस्थामा उपचार सम्भव नभएपछि थप उपचारका लागि राजधानी ल्याइएको छ । अन्य घाइतेको स्थानीय मेलम्ची अस्पतालमा उपचार भइरहेको छ । दुर्घटनामा बसेको छतमा बसेको अधिकांश यात्रु घाइते भएको बताइएको छ ।

बसका चालकलाई प्रहरीले नियन्त्रणमा लिएको छ । साँधुरो सडकमा क्षमताभन्दा बढी यात्रु राखेका कारण दुर्घटना भएको प्रहरले प्रारम्भिक अनुमान गरेको छ ।