नेपाल प्रहरीका असईद्वारा गोली हानी आत्महत्या

१२ फागुन, उदयपुर । उदयपुरमा नेपाल प्रहरीका एक सहायक निरीक्षकले आफैंले बोकेको पेस्तोलले गोली हानी आत्महत्या गरेका छन् ।

जिल्लाको उत्तरपूर्वी जालपा चिलाउने -५ गाविसमा रहेका अस्थायी प्रहरी पोष्ट सुकौराका प्रमुख सहायक निरीक्षक बलबहादुर राउतले बिहान करिब ६ बजेको समयमा प्रहरी पोष्टभित्रै गोली हानी आत्महत्या गरेको जिल्ला प्रहरी कार्यालय उदयपुरले जनाएको छ । ४२ वर्षीय सहायक निरीक्षक राउतको स्थायी ठेगाना सोलुखुम्बु जिल्लाको नेटा गाविस भएको बताइएको छ ।

जिल्ला प्रहरी कार्यालयका प्रहरी निरीक्षक खगेन्द्र खड्काले घटनाका सम्बन्धमा थप अनुसन्धान भइरहेको अनलाइनखबरलाई जानकारी दिनुभयो । खड्काका अनुसार राउतको शव अहिले घटनास्थलमै छ भने घटना छानविनका लागि प्रहरी नायव उपरीक्षक नगिन्द्रप्रसाद उप्रेतीको नेतृत्वमा एक टेाली घटनास्थलमा पुगेको छ । घटनास्थल जिल्ला सदरमुकामबाट करिब २२ किलोमिटरको दुरीमा पर्छ । आत्महत्याको कारण स्पष्ट हुन नसके पनि पारिवारिक तनावका कारणबाट घटना भएको हुनसक्ने अनुमान प्रहरीले गरेको छ ।