बान की मुन शान्ति प्रक्रिया सम्पन्न नभए नेपाल आउन नसक्ने सन्देश

३ चैत,  दक्षिण एसिया आउने भनिएका राष्ट्रसंघका महासचिव बान की मुन शान्ति प्रक्रिया सम्पन्न नभए नेपाल आउन नसक्ने सन्देश राष्ट्रसंघीय अधिकारीहरुले दिएका छन् । महासचिव बानका तर्फबाट अधिकारीहरुले नेपाल सरकार र एकीकृत माओवादी अध्यक्ष पुष्पकमल दाहाललाई त्यस्तो सन्देश दिएको जानकार श्रोतहरुले दाबी गरेका छन् ।
बान डेढ महिनापछि भारत, म्यान्मार र नेपालको भ्रमणमा आउने तयारीमा छन् । नेपाल आउने निधो भएको भनेर राजनीतिक नेताहरुले बताएपनि निमन्त्रता गर्ने नेपाल सरकारले भने आधिकारिक सूचना जारी गरेको छैन ।
श्रोतका अनुसार नेपाल सरकारले बानलाई औप्चारिक निमन्त्रता र भ्रमणको विषयवस्तुबारे अझै पत्र पठाएको छैन । पत्रबारे सरकार अझै छलफलमा रहेको र राष्ट्रसंघीय अधिकारीहरुसँग परामर्श गरिएको बुझिएको छ । माओवादी अध्यक्ष दाहाल संयोजकत्वको बृहत्तर लुम्बिनी विकाश राष्ट्रिय निर्देशक समितिको निमन्त्रणामा महासचिव बान आउन लागेको होइन भन्ने सन्देश पनि अधिकारीहरुले दिएका छन् ।
लुम्बिनी भ्रमणका लागि बान आउने नभइ नेपाल भ्रमणका लागि सरकारको निमन्त्रणा अनुसार आउने र त्यसक्रममा लुम्बिनीका काममा हुनसक्ने सरकार निर्धारित कार्यक्रममा भाग लिने पनि अधिकारीहरुले प्रष्ट पारेका छन् । नेपाल आएका बेला लुम्बिनीका कार्यक्रम भए उहाँ त्यसमा पनि भाग लिने राष्ट्रसंघीय अधिकारीहरुले बताएका आजको नागरिक दैनिकले छापेको छ । ।

Posted by Arghakhanch Online on 9:35 PM. Filed under News, राष्ट्रिय समाचार . You can follow any responses to this entry through the RSS 2.0