प्रधानमन्त्री डा बाबुराम भट्टराईले केही दिनभित्रै शान्ति प्रक्रियाले पूर्णता पाउने बताएका छन्।
News, राष्ट्रिय समाचार 8:44 PM
चैत १६- प्रधानमन्त्री डा बाबुराम भट्टराईले केही दिनभित्रै शान्ति प्रक्रियाले पूर्णता पाउने बताएका छन्। लामो समयदेखि थाँती रहेको शान्ति प्रक्रियाको काम आफ्नै कार्यकालमा अघि बढेको बताउँदै प्रधानमन्त्री भट्टराईले सेना समायोजनको काम एकाध दिनभित्रै पूरा हुने दाबी गरे। रेडियो नेपालद्वारा हिजो आयोजित जनतासँग प्रधानमन्त्री कार्यक्रममा सर्वसाधारण नागरिकले देशका विभिन्न भागबाट सोधेका प्रश्नको जवाफ दिने क्रममा प्रधानमन्त्रीले सत्य निरुपण तथा मेलमिलापलगायतका आयोग गठन गर्ने विधेयक पनि अन्तिम चरणमा पुगेको बताए।शान्ति र संविधानका सम्बन्धमा केही दिनयता राजनीतिक दलहरूबीच भएका छलफलमा देखिएको प्रगतिले अब ६० दिनभित्र ती काम पूरा हुने पनि प्रधानमन्त्रीले दृढता व्यक्त गरे।"शान्ति प्रक्रियाको काम सकिएपछि सबै मिलेर संविधान निर्माणको काममा लाग्नेछौ," प्रधानमन्त्री भट्टराईले भने।शान्ति र संविधानको काम पूरा भएर देशमा राजनीतिक स्थिरता कायम भएपछि आर्थिक विकासको काम अघि बढ्ने बताउँदै प्रधानमन्त्री भट्टराईले अहिले पनि ठूला परियोजनामा विदेशी लगानी भित्र्याउने तथा कृषि, पर्यटन, उद्योग क्षेत्रमा लगानी बढाउने सोच अघि बढाइएको बताए।संविधानका बाँकी रहेका विवादका विषयहरूमा प्रमुख दलका शीर्ष नेताहरू राजधानी बाहिर गएर दुई/तीन दिनसम्म छलफल गरेर भएपनि विवाद टुङ्ग्याउने प्रयास भैरहेको प्रधानमन्त्री डा भट्टराईले जानकारी दिए।अहिलेको सर्वाधिक चासोको विषय संविधान निर्माण र शान्ति प्रक्रिया टुङ्ग्याउनु हो, जेठ १४ भित्र संविधान बनाउनुको विकल्प छैन त्यसमा सबै राजनीतिक दलहरू मिलेर सहमतिमा पुग्नुपर्छ," प्रधानमन्त्री भट्टराईले भने।उनले काठमाडौंको सडक विस्तारमा केही दुःख भए पनि नियमसङ्गत ढङ्गले काम अघि बढाइएको र जनताको सहयोग पाएको बताए। रासस
Posted by Arghakhanch Online
on 8:44 PM.
Filed under
News,
राष्ट्रिय समाचार
.
You can follow any responses to this entry through the RSS 2.0