एक युवतीलाई अपहरण गरेर दुइ लाख फिरौती माग्ने दुइ प्रहरी पक्राउ
News, राष्ट्रिय समाचार 7:30 PM
२३ फागुन, कुबेतबाट फर्किएकी एक युवतीलाई अपहरण गरेर दुइ लाख फिरौती माग्ने दुइ प्रहरी पक्राउ परेका छन् । साढे दुइ वर्षअघि कुबेत पुगेकी सिन्धुपाल्चोककी सोममाया तामाङ काठमाण्डौ आएको थाहा पाएपछि प्रहरी प्रधान कार्यालयको भण्डार शाखामा कार्यरत प्रहरी हवल्दार होमबहादुर तामाङ र केन्द्रीय अनुसन्धान ब्युरोमा कार्यरत प्रहरी हवल्दार कमल राइले उक्त अपहरणको योजना बनाएका थिए ।
कुबेतबाट राजधानीको जोरपाटीमा रहेको मीतभाइको कोठामा बस्दै आएकी सोममाया तामाङलाई अपहरण गर्न गएका दुइ प्रहरी हवल्दारले सोममायाका मीतभाइलाई शुरुमा अपहरण गरी फिरौती मागेको र पछि उनलाई नै अपहरण गरी गोंगबुमा लगेर एउटा होटलमा राखेका थिए ।
कुबेतमा दुइ वर्ष बसेर काम गरिरहेकी सोममाया भिषाको म्याद गुजारेर बसेपछि कुबेत प्रहरीले ६ महिला जेल राखेर नेपाल फर्काएको थियो । कुबेतबाट टाट पल्टिएर नेपाल फर्केको ४ दिनपछि उनी अपहरणमा परेको महानगरीय प्रहरी वृत्त बौद्धले जानकारी दिएको छ ।
आजको नेपाल समाचारपत्रमा छापिएको खबर अनुसार अपहरणकारी प्रहरीले ट्याक्सीमा सोममायालाई राखेर गोंगबुको एक गेष्ट हाउसमा लगेर उनका मितभाइ मानबहादुरलाई २ लाख रुपैयाँ लिएर आउन धम्की दिएका थिए । प्रहरीकै अपहरणमा परेकी सोममायालाई होटलमा कुर्न बसेका प्रहरी हवल्दार कमल राइले जबरजस्ती ३ पटक करणी गरेको पीडितले बताएकी छिन् ।
श्रीमानले छाडेर अर्कै श्रीमती लिएर हिँडेपछि लालाबाला पाल्न सोममाया कुबेत पुगेकी थिइन् । तर कुबेतमा पनि जेल बस्नुपरेकी सोममायाले देशमा फर्किएपछि अपहरणमा पर्नु मात्र परेन आफ्नो अस्मिता पनि लुटियो ।
Posted by Arghakhanch Online
on 7:30 PM.
Filed under
News,
राष्ट्रिय समाचार
.
You can follow any responses to this entry through the RSS 2.0
