होजाईकी पत्नी थुनामा

काठमाडौ, फाल्गुन १९ - भारतमा पृथकतावादी आन्दोलनमा संलग्न निरञ्जन होजाईकी पत्नी सरिता गिरीलाई सम्पत्ति शुद्धीकरण मुद्दामा विशेष अदालतको आदेशमा बिहीबार जेल चलान गरिएको छ ।

विशेषका अध्यक्ष न्यायाधीश गौरीबहादुर कार्की र सदस्य न्यायाधीशद्वय ओमप्रकाश मिश्र, न्यायाधीश केदारप्रसाद चालिसेको इजलासले गिरीलाई चार करोड धरौटी तिर्न आदेश गरेको थियो । त्यो दिन नसकेपछि उनलाई त्रिपुरेश्वर जगन्नाथदेवलस्थित महिला कारागारमा लगिएको विशेषका रजिस्ट्रार धीरबहादुर चन्दले बताए । निर्मल राई र उनका पति होजाईलगायतलाई विपक्षी बनाउँदै सम्पत्ति शुद्धीकरण अनुसन्धान विभागले मंगलबार विशेषमा मुद्दा दायर गरेको थियो ।

त्यसैमाथि थुनछेकको सुनुवाइ गर्दै विशेषले राईलाई धरौटीको आदेश दिएको हो । होजाई भने भारतीय जेलमा थुनामा छन् । होजाईले नेपालमा निर्मल राईको नाममा नक्कली नागरिकता लिएर गिरीसँग बिहे गरेका थिए । होजाईले नेपालमा १३ करोडभन्दा बढी अवैध सम्पत्ति जोडेका थिए । त्यसको स्रोत देखाउन नसकेकाले उनलाई सम्पत्ति शुद्धीकरण निवारण ऐनबमोजिम विभागले मुद्दा दर्ता गरेको हो । अवैध सम्पत्ति लुकाउन होजाईलाई गिरीले मुख्य सहायता गरेकाले उनलाई पनि विभागले कसुरदार भन्दै विपक्षी बनाएको हो । तर अदालतमा गिरीले राई विदेशी हो भन्ने थाहा नभएकाले बिहे गरेको बयान दिएकी थिइन् । विशेष अदालतले भने उनको बयान अपत्यारिलो मानेको छ । गिरीले पतिको मृत्यु भएको भनी नक्कली प्रमाणपत्र बनाएर होजाईको सबै सम्पत्ति आफ्नोसमेत बनाएकी थिइन् ।

निर्मल राई नै निरञ्जन होजाई भएको तथ्यमा विवाद नभएको, पतिको मृत्यु भएको भनी मृत्यु दर्ता प्रमाणपत्र बनाई पतिको नाउँको घरजग्गा र गाडीहरूसमेत नामसारी गरी आफ्नो दाजु, बाबु, आमा र अन्य व्यक्तिका नाउँमा समेत हस्तान्तरण गरेको आदेशमा छ । सिंगापुरको सिटी बैंकबाट कानुनी स्रोत नखुलेको रुपैयाँ आउने खबर पाएपछि अन्य बैंकमा खाता हुँदाहुँदै एभरेस्ट बैंक लिमिटेड बानेश्वरमा छुट्टै खाता खोली १,८३,२०९ अमेरिकी डलरको हुने रु.१,४३,८८,९९१।७५ जम्मा गराएको समेतको तत्काल प्राप्त प्रमाणबाट देखिएको त्यसमा उल्लेख छ ।

आदेशमा भनिएको छ- 'सम्पत्ति शुद्धीकरणसम्बन्धी कसुरमा संलग्न रहेको भन्ने देखिएकाले बुझ्दै जाँदा ठहरेबमोजिम हुने गरी हाल विशेष अदालत ऐन, २०५९ को दफा ७ को खण्ड (घ) बमोजिम रु.४,५१,००,०००।- (चार करोड एकाउन्न लाख) नगद वा सो खाम्ने जेथा वा बैंक ग्यारेन्टी दिए लिई तारेखमा र सो दिन नसके अ.बं. १२१ नं. बमोजिम थुनुवा पुर्जी दिई थुनामा राखी कारबाही गर्नू ।'

होजाईको प्राडो गाडी, स्कुटर, झोला र चार्जरसहितको ल्यापटप, डिजिटल क्यामराको मेमोरी कार्ड, हायात गोल्ड पासपोर्ट कार्ड, पेन ड्राइभ, मोबाइल (नोकिया) थान २, लगायतका दसीका सामानलाई जिन्सी धरौटीमा राख्न पनि आदेश भएको छ ।(इकान्तिपुर  बाट )

सम्बन्धित पोस्ट हरु : News, राष्ट्रिय समाचार